sri kamala kavacham in telugu
శ్రీ కమలా కవచం
ఈశ్వర ఉవాచ |
అథ వక్ష్యే మహేశాని కవచం సర్వకామదమ్ |
యస్య విజ్ఞానమాత్రేణ భవేత్సాక్షాత్సదాశివః || 1 ||
నార్చనం తస్య దేవేశి మంత్రమాత్రం జపేన్నరః |
స భవేత్పార్వతీపుత్రః సర్వశాస్త్రేషు పారగః |
విద్యార్థినా సదా సేవ్యా విశేషే విష్ణువల్లభా || 2 ||
అస్యాశ్చతురక్షరివిష్ణువనితారూపాయాః కవచస్య శ్రీభగవాన్ శివ ఋషిరనుష్టుప్ఛందో, వాగ్భవీ దేవతా, వాగ్భవం బీజం, లజ్జా శక్తిః, రమా కీలకం, కామబీజాత్మకం కవచం, మమ సుపాండిత్య కవిత్వ సర్వసిద్ధిసమృద్ధయే జపే వినియోగః ||
అథ కవచమ్ |
ఐంకారీ మస్తకే పాతు వాగ్భవీ సర్వసిద్ధిదా |
హ్రీం పాతు చక్షుషోర్మధ్యే చక్షుర్యుగ్మే చ శాంకరీ || 1 ||
జిహ్వాయాం ముఖవృత్తే చ కర్ణయోర్గండయోర్నసి |
ఓష్ఠాధరే దంతపంక్తౌ తాలుమూలే హనౌ పునః || 2 ||
పాతు మాం విష్ణువనితా లక్ష్మీః శ్రీవర్ణరూపిణీ |
కర్ణయుగ్మే భుజద్వంద్వే స్తనద్వంద్వే చ పార్వతీ || 3 ||
హృదయే మణిబంధే చ గ్రీవాయాం పార్శ్వయోః పునః |
సర్వాంగే పాతు కామేశీ మహాదేవీ సమున్నతిః || 4 ||
వ్యుష్టిః పాతు మహామాయా ఉత్కృష్టిః సర్వదాఽవతు |
సంధిం పాతు సదా దేవీ సర్వత్ర శంభువల్లభా || 5 ||
వాగ్భవీ సర్వదా పాతు పాతు మాం హరిగేహినీ |
రమా పాతు సదా దేవీ పాతు మాయా స్వరాట్ స్వయమ్ || 6 ||
సర్వాంగే పాతు మాం లక్ష్మీర్విష్ణుమాయా సురేశ్వరీ |
విజయా పాతు భవనే జయా పాతు సదా మమ || 7 ||
శివదూతీ సదా పాతు సుందరీ పాతు సర్వదా |
భైరవీ పాతు సర్వత్ర భైరుండా సర్వదాఽవతు || 8 ||
త్వరితా పాతు మాం నిత్యముగ్రతారా సదాఽవతు |
పాతు మాం కాలికా నిత్యం కాలరాత్రిః సదాఽవతు ||9 ||
నవదుర్గా సదా పాతు కామాఖ్యా సర్వదాఽవతు |
యోగిన్యః సర్వదా పాంతు ముద్రాః పాంతు సదా మమ ||10 ||
మాతరః పాంతు దేవ్యశ్చ చక్రస్థా యోగినీగణాః |
సర్వత్ర సర్వకార్యేషు సర్వకర్మసు సర్వదా || 11 ||
పాతు మాం దేవదేవీ చ లక్ష్మీః సర్వసమృద్ధిదా |
ఇతి తే కథితం దివ్యం కవచం సర్వసిద్ధయే || 12 ||
యత్ర తత్ర న వక్తవ్యం యదీచ్ఛేదాత్మనో హితమ్ |
శఠాయ భక్తిహీనాయ నిందకాయ మహేశ్వరి || 13 ||
న్యూనాంగే అతిరిక్తాంగే దర్శయేన్న కదాచన |
న స్తవం దర్శయేద్దివ్యం సందర్శ్య శివహా భవేత్ || 14 ||
కులీనాయ మహోచ్ఛ్రాయ దుర్గాభక్తిపరాయ చ |
వైష్ణవాయ విశుద్ధాయ దద్యాత్కవచముత్తమమ్ || 15 ||
నిజశిష్యాయ శాంతాయ ధనినే జ్ఞానినే తథా |
దద్యాత్కవచమిత్యుక్తం సర్వతంత్రసమన్వితమ్ || 16 ||
విలిఖ్య కవచం దివ్యం స్వయంభుకుసుమైః శుభైః |
స్వశుక్రైః పరశుక్రైశ్చ నానాగంధసమన్వితైః || 17 ||
గోరోచనాకుంకుమేన రక్తచందనకేన వా |
సుతిథౌ శుభయోగే వా శ్రవణాయాం రవేర్దినే || 18 ||
అశ్విన్యాం కృత్తికాయాం వా ఫల్గున్యాం వా మఘాసు చ |
పూర్వభాద్రపదాయోగే స్వాత్యాం మంగళవాసరే || 19 ||
విలిఖేత్ ప్రపఠేత్ స్తోత్రం శుభయోగే సురాలయే |
ఆయుష్మత్ప్రీతియోగే చ బ్రహ్మయోగే విశేషతః || 20 ||
ఇంద్రయోగే శుభయోగే శుక్రయోగే తథైవ చ |
కౌలవే బాలవే చైవ వణిజే చైవ సత్తమః || 21 ||
శూన్యాగారే శ్మశానే వా విజనే చ విశేషతః |
కుమారీం పూజయిత్వాదౌ యజేద్దేవీం సనాతనీమ్ ||22 ||
మత్స్యమాంసైః శాకసూపైః పూజయేత్పరదేవతామ్ |
ఘృతాద్యైః సోపకరణైః పూపసూపైర్విశేషతః || 23 ||
బ్రాహ్మణాన్భోజాయిత్వాదౌ ప్రీణయేత్పరమేశ్వరీమ్ |
బహునా కిమిహోక్తేన కృతే త్వేవం దినత్రయమ్ || 24 ||
తదాధరేన్మహారక్షాం శంకరేణాభిభాషితమ్ |
మారణద్వేషణాదీని లభతే నాత్ర సంశయః || 25 ||
స భవేత్పార్వతీపుత్రః సర్వశాస్త్రవిశారదః |
గురుర్దేవో హరః సాక్షాత్పత్నీ తస్య హరప్రియా || 26 ||
అభేదేన భజేద్యస్తు తస్య సిద్ధిరదూరతః |
సర్వదేవమయీం దేవీం సర్వమంత్రమయీం తథా || 27 ||
సుభక్త్యా పూజయేద్యస్తు స భవేత్కమలాప్రియః |
రక్తపుష్పైస్తథా గంధైర్వస్త్రాలంకరణైస్తథా || 28 ||
భక్త్యా యః పూజయేద్దేవీం లభతే పరమాం గతిమ్ |
నారీ వా పురుషో వాపి యః పఠేత్కవచం శుభమ్ |
మంత్రసిద్ధిః కార్యసిద్ధిర్లభతే నాత్ర సంశయః || 29 ||
పఠతి య ఇహ మర్త్యో నిత్యమార్ద్రాంతరాత్మా
జపఫలమనుమేయం లప్స్యతే యద్విధేయమ్ |
స భవతి పదముచ్చైః సంపదాం పాదనమ్రః
క్షితిపముకుటలక్ష్మీర్లక్షణానాం చిరాయ || 30 ||
ఇతి శ్రీవిశ్వసారతంత్రోక్తం చతురక్షరీ విష్ణువనితా కవచం నామ శ్రీ కమలా కవచమ్ |
Also read: శ్రీ చండీ కవచం